O DOCSIS 3.0 e os 100 megas: xa eeestán aquííííí!!!!!

Non se trata de citar a famosa frase de Poltergeist porque vois vaia contrar unha trola ou unha pantasmada. Todo o contrario. Moitos de nós soñábamos co día no que puidéramos ver conexións de 100 megas. Pois xa podemos ir deitarnos pracidamente porque ese día está moito máis próximo do pensamos. Con dicirvos que en R que xa os estamos probando...

Sempre comentamos que se algo nos diferenciaba dos outros operadores era a decisión que tomamos xa no ano 2000 en construír a nosa propia rede de fibra óptica, en vez de facer coma o resto de operadores en España que alugan a rede de Telefónica. Parecíamos os tolos do lugar por facelo xa daquela e por riba, en Galicia. Agora estamos contentos daquela arriscada decisión e o modelo HFC ou rede híbrida de fibra óptica e coaxial (que leva a televisión) estanos dando suficiente vantaxe para tratar de ser mellores que o resto, e sobre de todo, que a poderosa Telefónica.

Se mirades os datos da Comisión do Mercado das Telecomunicacións sobre as conexións de banda ancha en España, veredes que o 60% destas tiñan só 3 ou 4 megas de velocidade "nominal". Fronte a isto, en Galicia o 62% da xente que ten R se conectan con unha velocidade garantida de entre 6 e 9 megas. Para os que traballamos aquí, e gustaríanos que tamén para vós, é unha satisfacción poder pensar que axudamos un chisco a que en Galicia poidamos ter unhas boas conexions á internet, e se é posible coma ata o de agora, mellores mesmo que as grandes áreas urbanas como Madrid e Barcelona. Por iso andamos extendendo a rede de fibra por Galicia adiante, chegando a sitios onde nin siquera nós pensabamos, sendo sinceros, que poderíamos chegar algún día con isto da fibra óptica.

A idea que perseguimos é sinxela. Canto máis cerca estea a fibra óptica de vós, máis poderemos subir a velocidade ou aumentar a capacidade. Hoxe en día achegamos a fibra óptica ás vosas casas, máis ou menos cada 80 fogares conectados a R. É unha especie de “entrada ou saída á autoestrada" en forma de datos que está ao ladiño das vosas portas.

Pero a cousa non vai quedar aí, faltaría máis. Que vos parecereía se vos dixera que de aquí a tres anos os coches van multiplicar a súa velocidade por 100. Que en lugar de ir como hoxe en día, a uns 100 km/h, irán no ano 2011 a 10.000 quilómetros por hora. De seguro que me dicides que estou tolo. Como se vos falara de marcianos, de coches voadores e de cidades que medran soas. Pois aínda que non podemos “trucar” a velocidade dos coches, coa de internet si que podemos facer cousas polo estilo: aí están os 100 megas dos que vos falaba e que son toda unha realidade.

Vós non sei se o lembrades, pero eu si, porque xusto coincidiu coa miña entrada en R (como pasa o tempo). O caso é que no 2005 as velocidades que ofrecíamos eran de 300, 600 e 1.200 Kbps. Así que en tres anos a velocidade da conexión á Rede terase multiplicado case por 100. De 1,2 megas a 100, case nada.

Preguntarédesvos como é posible isto? Como vos dixen, porque temos a infraestrutura e podemos ir optimizando a rede. De nada serviría ter unha autoestrada de catro carrís para despois ir por ela a 30 km/h nun coche sen carné ou nun tractor. Nós, unha vez que puxemos os alicerces, a nosa rede, estamos a traballar para que collades velocidade sobre ela. É dicir, estamos a mellorar a tecnoloxía que permite enviar os datos a través da rede. Agora estamos no DOCSIS 2.0, pero para os 100 Mbps xa pasamos de nivel e chegamos ao DOCSIS 3.0. Algo así como cando Songoku pasaba de Superguerreiro a Super Saián de nivel 2, pero sen pelos de punta nin historias.

Para os que non o saiban, DOCSIS significa Data Over Cable Service Interface Specification ou, en galego, “Especificación de Interface sobre Servizos de Datos por Cable". E que ten entón o DOCSIS 3.0 para que o comparemos con Super Saián de nivel 2? Pois que é capaz de dar máis velocidade a un usuario que os seus predecesores. No DOCSIS 1.x e no 2.0 empregábase unha canle de baixada e outra de subida para darvos servizo, e tiñades que compartir estas canles con outros usuarios. Agora cambia o conto e podemos crear varias canles maiores a partir das xa existentes.

E o mellor de todo é que o DOCSIS 3.0 ten velocidade mínima, pero non máxima. Cun cablemódem de 4 canles podemos dar velocidades de ata 100 Mbps. Se collemos xa un cablemódem de 8 canles, do que hai un prototipo, poderíamos dar o dobre de velocidade e no futuro... No futuro xa veremos, porque o problema, do que vos falarei máis adiante, van ser os equipos (ordenadores, cablemódems, servidores), que van quedar nalgúns casos por detrás da tecnoloxía. Imaxinade: con eses 100 megas poderíades baixar unha película que pesara 1 xiga (por exemplo a da voda dun amigo, que é o típico nestes casos) en tan só 80 segundos. Iso se houbera un servidor que soportara ben esa velocidade, claro está.

E para os que vos dea vertixe tanta velocidade, non vos preocupes que para vós tamén temos pensado outras que vos deixarán impactados, aínda que non tanto (como as de 30 e as de 60 Mbps).

Chegado a este punto, máis dun de seguro que está afiando as gadoupas para saltarme á chepa... Pois recollede ancóras, porque si: este ano tamén aumentaremos as velocidades que xa tendes contratadas. Pero como son así de malo, iso xa é unha historia para outro post.

E como dicía SuperRatón, non esquezades vitaminarvos e supermineralizarvos, que falta vos fará ante as novidades que vos temos preparadas :D

Comentarios

Enviar un comentario